Аймгийн арслан С.Ерөөлт түрүүллээ

Увс аймгаас төрөн гарсан улсын алдар цолтой бөхчүүдийн нэрэмжит аймаг цэргийн цолтнуудын барилдааныг сар бүр тогтмол явуулах болсон билээ. Энэ сарын барилдааныг Увс аймгийн Тэс сумын харьяат, ид залуу барилдаж байх даа ирлэсэн тонгорог шиг мундаг явсан Эрдэнийн Батбаатарын нэрэмжит болгон зохион байгуулжээ. Барилдаанд а.х.а Ш.Шинэбаяр, а.а Т.Мягмаржав нараар манлайлуулсан хүчит 32 бөх барилдсан байна. Барилдаанд Дархан-Уул аймгийн Хонгор сумын харьяат, Төмөр замын 6-р ангийн бөх, аймгийн арслан Сүхбаатарын Ерөөлт түрүүлсэн бол Ховд аймгийн Буянт сумын харьяат аймгийн залуу арслан Оргихын Хангайн үзүүр булаасан байна. Барилдааны их шөвөгт Өвөрхангай аймгийн Хужирт сумын харьяат аймгийн арслан Цэндзэсэмийн Чимэддорж, мөн аймгийн Уянга сумын харьяат, аймгийн начин Хүрэл-Очирын Гантулга шалгарсан байна.
Мөн дунд шөвөгт Говь-Алтай аймгийн Жаргалан сумын харьяат, аймгийн хурц арслан Шоовдойхүүгийн Шинэбаяр, Увс аймгийн Тэс сумын харьяат, залуу начин Төрөөгийн Баасанхүүгийн ах, аймгийн арслан Мягмаржав, Дорнод аймгийн Цагаан-Овоо сумын харьяат, аймгийн арслан Пүрэвжавын Мөнхбат, Сэлэнгэ аймгийн Мандал сумын харьяат, Увс нуур дэвжээний бөх аймгийн залуу арслан Нэгдэлийн Жаргалбаяр нар шалгаран үлджээ.

МУИС-ийн оюутан Т.Түмэндэмбэрэл